في عيد ميلادك

نويت انا في عيدك اليوم اهنِّيك
واقول يا بدر الدجى الف مبروك
زهر البنفسج سارقن من حلاويك
ولون الزهر في صافي الخد مفروك
اشوف انا العشّاق لاجلك مهاليك
عزيز يا غصن(ن) حمى ورده الشوك
يا جاعل الزينات حولك مماليك
وفي عرش راس الزين يا حلو حطوك
ريح الصبا من عالية نجد هاويك
يمشي يطير ويقطع البحر سنبوك
ارسل معه تبريك قلبن يحيّيك
ولو كان عقد الوصل هاليوم مفكوك
هي خيرة الله تبعدك ثم تدنيك
نفس الذي جابوك بالبعد ردوك
ماخطاك م الاقدار ماهوب ناصيك
واللي يصيبن لو تخفيت ما اخطوك
لو طالت الايام مانيب ناسيك
مانساك ومانسى ناس بالنسي نسّوك
اشوف انا العذّال بالهرج تشريك
ومع قادم الايام لازم يبيعوك
طاوعت وسواس(ن) يِوسِّك يحاكيك
وناس(ن) يسبوني وعندي يسبّوك
أقول يا شمعات كيك(ن) مشاكيك
تتوجت بالنار من ساع شبوك
ياكبر حظك يوم خلّي يطفيك
تشوف بشر الوجه شعشع به ضْحوك
ناس(ن) تبارك لك وناس(ن) حواليك
وناس(ن) تموت من الحساير تمنّوك
يضيع ليلي ساهر(ن) بك وانجايك
قلبي وروحي بالخلا كم نادوك
يا بيت ياللي تايهات(ن) معانيك
ضاعت حروفك بين الاسطار والبوك
يبكي القلم لا جيت بابني مبانيك
دموعه على الاسطار بالحس مشروك
يا بيت سلّيني وانا مثل اسليّك
واحفظ وداد اللي على الصفح خطوك
لا تعتذر لي كلما جيت اغنيّك
نجوم السماء من حظها كم غنّوك


منقووووول


ميدو الحب